Denis Shtraza është dënuar për jetë nga Krimet e Rënda.
Ai është shpallur fajtor për rrëmbimin dhe vrasjen e Gazmend Çollakut më 6 janar të 2016-ës, trupi i të cilit u gjet në Murqinë të Krujës.
I akuzuar për ngjarjen ka qenë edhe Ervin Dalipaj, i cili u ekzekutua në një atentat në 2017-ën.
Ja çfarë pat deklaruar Shtraza në korrik të 2017-ës
Shtraza ka mohuar por njëkohësisht ka dhënë edhe një alibi ku ka treguar se ka qenë në Tiranë kur ka ndodhur vrasja.
“Nuk kam asnjë lidhje me vrasjen e Çollakut. Me atë jam njohur në burg por s’kisha përplasje. Kur u plagosa në 2013, nuk kam fajësuar Çollakun”, ka thënë Denis Shtraza në seancë.
Ai ka shpjeguar gjithashtu dhe lidhjen me ish-shefin e krimeve, të vrarë tashmë Ervin Dalipaj, gjithashtu i akuzuar për rrëmbimin dhe vrasjen e Gazmend Çollakut.
“Me Ervin Dalipajn jam njohur në Durrës, kishim një plazh privat. Kur u vra Çollaku kam qenë te 21 dhjetori në Tiranë. Takova Ervin Dalipajn dhe ikëm në Durrës. Për gjurmët e gjakut dhe telefonat nuk di asgjë”, ka deklaruar Shtraza.
Ngjarja sipas Policisë
Më datë 06.01.2016, në lagjen Nr.1 në Durrës, 4 persona, 3 prej të cilëve me jelekë dhe mbishkrimin ”Policia”, kanë marrë me forcë duke e futur në mjetin e tyre tip “Audi A6” me ngjyrë të zezë shtetasin Gazment Çollaku 34 vjeç, banues në Durrës.
Çollaku u gjet i vrarë me armë zjarri një ditë më pas në fshatin Murqin, Krujë, i hedhur në rrugë dhe me gjymtyrë të lidhura.